កំណាព្យគុណគ្រូ

គុណគ្រូ

លោកគ្រូអ្នកគ្រូគឺជាម៉ែឪ                                                   ដែលតែងប្រដៅដល់យើងគ្រប់គ្នា

ទោះបីហត់នឿយក៏លោកពុំរា                                         ចង់ឱ្យសិស្សជាបានចំណេះដឹង ។

ជីវិតលោកគ្រូទោះខ្លួនក្រក្រី                                              តែលោកឃ្មាតខ្មីព្យាយាមប្រែងប្រឹង

ស្រាវជ្រាវយប់ថ្ងៃទុកជាពំនឹង                                          ចែកឱ្យសិស្សដឹងបានភ្លឺនេត្រា ។

ជីវិតមួយនេះហាក់ទុកឱ្យសិស្ស                                       មិនដែលអើងរើសសិស្សគ្រប់រូបា

ទូន្មានប្រដៅមិនគិតអាត្មា                                                 ព្រោះចិត្តប្រាថ្នាចង់ឱ្យសិស្សយល់ ។

ពេលវាយសិស្សហើយពេលក្រោយអាណិត               ដល់សិស្សមាសស្និទ្ធគ្រូគិតដិតដល់

សូមទោសកូនសិស្សដែលគ្រូខ្វះផ្តល់                             គ្មានសុមង្គលដល់យើងគ្រប់គ្នា ។

សូមទោសក្នុងចិត្តអាណិតកូនណាស់                             គ្រូមិនដែលផ្ដាស់ប្រមាថឫកពា

តែកូនខំរៀនឱ្យបានវិជ្ជា                                                  មុននិងគ្រូលាជូនពរបួនប្រការ ៕

និពន្ធដោយ ស៊ិន អក្ខរា ១៣/១២/២៥៦១